Festivali i Këngës në RTSH po afron dhe bashkë me të ka nisur edhe lakimi i emrave që do të ngjiten në skenën e madhe të fundvitit. Përveç artistëve të afirmuar, këtë vit po qarkullojnë gjithashtu emra surprizë që pritet të rikthehen pas shumë vitesh mungesë.
Nga aplikimet e publikuara deri tani, bien në sy disa prej artistëve më të njohur të skenës: Enis Neziri, Vedat Ademi, Fifi & Tiri, Erik Lloshi, Lorenc Hasrama & Lynx, Evi Reçi & Gerta Mahmutaj, Enxhi Nasufi, Sara Kapo, Kamela Islamaj, Alis Kallaci & Edmond Mancaku, Voltan Prodani dhe Sergio Hajdini.
Ndërkohë, ajo që ka ndezur diskutime është një emër i madh i muzikës shqiptare ndërkombëtare: Era Istrefi. Zëra jozyrtarë nga korridoret e RTSH-së flasin për bisedime mes këngëtares dhe organizatorëve, duke e kthyer emrin e saj në një nga më të përfolurit e këtij edicioni. Një rikthim i mundshëm i Istrefit në skenën shqiptare, me ambicien për Eurovision, do të shtonte ndjeshëm rivalitetin dhe pritshmëritë.
Burime nga prapaskenat e festivalit përmendin gjithashtu se disa artistë si Fifi dhe Enis Neziri shihen si pretendentë kryesorë për çmimin e madh, falë baladave të tyre të fuqishme dhe vokalit të konsoliduar që ka fituar përqafimin e publikut.
Ky edicion pritet të sjellë një larushi performancash dhe rrymash muzikore, duke përfshirë edhe emra të rinj që do të ngjiten për herë të parë në këtë skenë, duke ngjallur kuriozitet te publiku.
Festivali i Këngës mbetet ngjarja më e madhe muzikore e vitit në Shqipëri dhe gjithnjë e më shumë shihet si porta kryesore për përfaqësimin në Eurovision. Për momentin, lista zyrtare e pjesëmarrësve nuk është shpallur, por pritshmëritë janë të larta dhe diskutimet vetëm sa po nxisin më shumë etjen e publikut për spektaklin e fundvitit.
