Spotify dhe OpenAI kanë nisur një bashkëpunim të ri që i lejon përdoruesit të gjejnë dhe dëgjojnë muzikë ose podkaste direkt brenda ChatGPT, pa pasur nevojë të ndërroni aplikacione. Kënga juaj e radhës e preferuar mund të vijë thjesht nga një bisedë me inteligjencën artificiale.
Integrimi i ri e bën të mundur që përdoruesit e Spotify Free dhe Premium të kërkojnë rekomandime për këngë, albume, lista dëgjimi apo podkaste drejtpërdrejt në ChatGPT.
Mjafton të përmendin Spotify në mesazh dhe të lidhin llogarinë një herë. Pas kësaj, ChatGPT gjeneron sugjerime të personalizuara bazuar në humorin, zhanret dhe artistët e preferuar, ndërsa klikimi mbi rekomandimin e hap menjëherë aplikacionin Spotify për dëgjim pa ndërprerje.
Ky integrim sjell një përvojë dinamike: nga krijimi i kolonave zanore për fundjavë, te zgjedhja e këngëve për stërvitje apo relaks, ChatGPT kupton kontekstin e bisedës dhe propozon përmbajtje që i përshtatet momentit.
Spotify thekson se përdoruesit kanë kontroll të plotë mbi llogaritë e tyre – lidhja dhe shkëputja mund të bëhen në çdo kohë. Të dhënat audio, video dhe muzikore nuk ndahen me OpenAI për qëllime trajnimi, duke garantuar privatësinë dhe mbrojtjen e krijuesve.
Aplikacioni është aktualisht i disponueshëm në anglisht në 145 vende për të gjitha llogaritë ChatGPT (Free, Plus dhe Pro), si në web ashtu edhe në iOS dhe Android.
Spotify njoftoi se shpërndarja e funksionit filloi më 6 tetor 2025, dhe paralajmëroi përmirësime të mëtejshme gjatë javëve në vijim.
Ky hap shënon një nivel të ri të ndërveprimit mes përdoruesve dhe muzikës. Ndërsa OpenAI paralajmëron integrime të tjera me aplikacione si Instacart, Expedia, KAYAK, Shopify dhe OpenTable, ChatGPT po shndërrohet në një qendër multifunksionale ku përdoruesit mund të planifikojnë, blejnë, rezervojnë dhe dëgjojnë muzikë – të gjitha nga e njëjta bisedë.
