Ish-presidenti amerikan Donald Trump ka deklaruar se lufta në Ukrainë është më e ndërlikuar për t’u zgjidhur sesa konflikti në Lindjen e Mesme.
Në një prononcim për mediat, Trump tha se ishte befasuar nga kompleksiteti i situatës në Ukrainë:
“Mendova se do të ishte më e lehtë, por në fakt është më e vështirë se Lindja e Mesme,” – deklaroi ai, duke shtuar se është “shumë i zhgënjyer nga Putini”.
Trump ka përsëritur se prioriteti i tij mbetet arritja e një marrëveshjeje paqeje të qëndrueshme, por ka pranuar se pengesat diplomatike dhe interesat e përfshira e bëjnë këtë proces më të vështirë sesa pritej.
Ndërkohë, nga Kievi, presidenti ukrainas Volodymyr Zelensky ka akuzuar Rusinë për përdorimin e cisternave të naftës si mjet për spiunazh dhe sabotime.
Në një deklaratë në rrjetin Telegram, Zelensky bëri të ditur se informacionet janë marrë nga Shërbimi i Inteligjencës së Jashtme të Ukrainës, duke paralajmëruar se Rusia po përdor këto mjete jo vetëm për financimin e luftës, por edhe për operacione të fshehta ushtarake dhe destabilizuese.
“Aktualisht, rusët po përdorin cisternat e naftës jo vetëm për të fituar para për luftën, por edhe për mbledhje informacionesh dhe akte sabotimi. Kjo mund të ndalet,” – shkroi Zelensky.
Ai theksoi se Ukraina po bashkëpunon ngushtë me aleatët perëndimorë për të ndalur këto aktivitete dhe për të siguruar transparencë dhe mbrojtje ndaj kërcënimeve hibride që vijnë nga Rusia.
