Policia e Kosovës në Zveqan ka arrestuar një person të dyshuar për veprën penale “Vjedhje e rëndë në tentativë”, të raportuar një ditë më parë.
Sipas njoftimit zyrtar, personi i dyshuar me inicialet ZH.I. (36 vjeç) dyshohet se më 7 tetor 2025, rreth orës 16:50, ka hyrë përmes dritares në objektin e Shtëpisë së Shëndetit në Zveqan, ku kishte përgatitur disa sende për t’i vjedhur. Megjithatë, veprimet e tij janë ndërprerë pasi është vërejtur nga një punëtor i institucionit, pas çka i dyshuari është larguar në drejtim të panjohur.
Pas një pune hetimore, njësia e hetimeve e Stacionit Policor në Zveqan ka arritur ta identifikojë dhe më pas ta arrestojë të dyshuarin në shtëpinë e tij. Gjatë intervistimit, ai e ka pranuar veprën penale, ndërsa me urdhër të prokurorit është liruar në procedurë të rregullt.
Ndaj tij është iniciuar rasti “Vjedhje e rëndë në tentativë” dhe hetimet po vazhdojnë.
Policia e Kosovës ka theksuar se mbetet e përkushtuar në zbatimin e ligjit dhe ndëshkimin e të gjithë personave që kryejnë ose tentojnë të kryejnë vepra penale.
