Tabloidi britanik The Sun ka publikuar një artikull tronditës mbi bandat kriminale shqiptare që veprojnë në Evropë dhe Britani, duke i akuzuar ato për përdorimin e metodave brutale të karteleve meksikane për të frikësuar, torturuar dhe eliminuar rivalët.
Sipas hetimeve të gazetës, grupet shqiptare janë bërë gjithnjë e më të dhunshme dhe po dominojnë tregtinë e drogës në disa shtete të BE-së dhe në Mbretërinë e Bashkuar. “Kriminelët po varin rivalët nëpër shtylla në Evropë”, shkruan The Sun, duke kujtuar një rast tronditës në Britani, ku një peng u torturua për katër ditë dhe iu shkëputën thonjtë para se të lirohej.
Një nga ngjarjet më të bujshme, sipas raportit, është vrasja e Bekim Halilajt, 29 vjeç, i cili u gjet i varur pas një tabele rrugore në Bruksel muajin e kaluar. Ai dyshohet se u ekzekutua nga bashkëpunëtorët e tij pas humbjes së një sasie të madhe droge. Halilaj ishte dënuar më parë në Britani për kontrabandë të mbi 4 milionë paund kokainë nëpërmjet portit të Southampton-it.
Pamjet nga vendngjarja tronditën kalimtarët, të cilët në fillim menduan se trupi i përgjakur i varur ishte një dekorim për Halloween. Vetëm më vonë u zbulua se bëhej fjalë për një vrasje të kryer me brutalitet ekstrem.
Dhuna e stilit “kartel”: Tortura, prerje kokash dhe zhdukje misterioze
Ekspertët e krimit të organizuar i thanë The Sun se dhuna e përdorur nga bandat shqiptare është përshkallëzuar ndjeshëm dhe po ndjek “manualin” e karteleve të Amerikës Latine. Profesori i kriminologjisë në Universitetin Shtetëror të Tiranës, Ervin Karamuço, u shpreh se kriminelët shqiptarë kanë filluar të marrin “konsulencë” nga vrasës me pagesë të trajnuar në Meksikë.
“Shkollat e torturës dhe dhunës vdekjeprurëse të karteleve meksikane janë bërë model për rrjetet kriminale shqiptare – një mënyrë për të vendosur frikë dhe kontroll absolut në tregtinë e drogës. Instruktorë nga kampet famëkeqe të trajnimit për vrasës me pagesë tani shërbejnë si konsulentë për grupet që blejnë ‘ekspertizën’ e tyre”, – tha Karamuço.
Ai shtoi se bandat shqiptare po bashkëpunojnë drejtpërdrejt me kartelet në Amerikën Latine, duke përvetësuar teknika të sofistikuara që e bëjnë pothuajse të pamundur ndjekjen penale të tyre.
Tortura për borxhe dhe hakmarrje
Në një rast tjetër, një 30-vjeçar shqiptar u mbajt peng për katër ditë në Londrën Lindore në vitin 2022, pasi kishte humbur një sasi kanabisi. Gjatë robërisë, ai u rrah brutalisht dhe iu hoqën thonjtë. Policia shpëtoi viktimën gjatë një bastisjeje në shtëpi, duke arrestuar gjashtë persona. Megjithatë, çështja u rrëzua në Gjykatën e Harrow pasi një dëshmitar kyç u tërhoq.
Vetëm Nekid Arapi, 26 vjeç, i njohur me nofkën “Kid Vlonjati”, u dënua me 16 muaj burg për posedim droge. “Njeriu i rrëmbyer ishte torturuar rëndë dhe iu ishin hequr thonjtë”, njoftoi policia në atë kohë.
Vrasje brenda burgut dhe gjakmarrje kriminale
Gazeta britanike kujton edhe vrasjen e Arben Lleshit, i cili u ekzekutua brenda burgut të Peqinit dy vite më parë. Lleshi ishte dënuar me 32 vjet burg në Britani për vrasjen e tregtarit shqiptar të drogës Agim Hoxha, trupi i të cilit u gjet i djegur në një makinë pranë Southampton-it.
Sipas burimeve të The Sun, ekzekutimi i Lleshit në burg lidhej me hakmarrje për aktivitetet kriminale jashtë Shqipërisë. “Nuk ka dyshim që vrasja e tij kishte motive brenda rrjetit ndërkombëtar të drogës”, tha një burim.
Zhdukje dhe kërcënime në rrjete sociale
Një tjetër rast i pazgjidhur është ai i Aron Kato, 28 vjeç, i cili u pa për herë të fundit në vitin 2019 në Ilford, Londra Lindore. Pamjet e kamerave e tregojnë teksa shtyhet dhe futet me forcë në një BMW të zezë – që prej asaj dite, ai nuk është gjetur kurrë. Policia britanike dyshon se zhdukja lidhet me grabitjen e një ferme kanabisi të kontrolluar nga një bandë shqiptare.
Në maj të këtij viti, një video në TikTok e postuar nga miqtë e tij tregon dy burra me maska që kërcënojnë një shqiptar për hakmarrje, duke i vënë një thikë në kokë dhe e detyrojnë të përmendë emrin e Aronit. Videoja pasohet nga një rap që i kushtohet viktimës, ndërsa përmendet se gruaja e tij sapo kishte lindur një djalë.
“Eksporti i frikës”: Rrjetet shqiptare, ndër më të rrezikshmet në Evropë
The Sun e mbyll analizën me paralajmërimin se bandat shqiptare po shndërrohen në një “fuqi kriminale transnacionale”, duke kombinuar disiplinën ballkanike me metodat brutale të karteleve të Meksikës. Hetimet në Belgjikë, Britani, Itali dhe Holandë po tregojnë një rritje të ndjeshme të rasteve të dhunës ekstreme, ku krimi nuk ndalet vetëm te trafiku i drogës, por përfshin edhe pengmarrje, zhdukje dhe vrasje makabre.
