Burgjet në Belgjikë kanë arritur kapacitetin maksimal, duke munguar aktualisht rreth 2,000 vende. Përballë kësaj situate, qeveria belge po shqyrton opsione të jashtëzakonshme, përfshirë strehimin e disa të burgosurve në Kosovë, duke ndjekur shembullin e marrëveshjes së ngjashme midis Danimarkës dhe Kosovës.
Sipas agjencisë belge të lajmeve, Belga, Brukseli po studion mundësinë e marrjes me qira ose ndërtimit të një burgu në Kosovë për të vendosur aty personat e dënuar apo individët pa leje qendrim në Belgjikë.
Ministrja belge e Drejtësisë, Annelies Verlinden, së bashku me ministren e Migracionit, Anneleen Van Bossuyt, udhëtuan së fundi në Kosovë për të zhvilluar bisedime lidhur me këtë çështje.
Ligji i ri dhe mungesa e vendeve në burg
Kapasitetet e limituara të burgjeve belgje kanë detyruar miratimin e një ligji të ri këtë verë, sipas të cilit në aktgjykimet për dënimin me burg duhet të argumentohet me saktësi arsyeja përse dënimi është domosdoshmërisht i nevojshëm.
Belgika përballet me një mungesë të afërsisht 2,000 vendeve në burgje, ndërsa historikisht është kritikuar për kushtet jodinjitoze në institucionet e saj penale. Në vitin 2014, vendi u dënua nga Gjykata Europiane për të Drejtat e Njeriut, dhe pas kësaj kritikat nga Këshilli i Europës nuk kanë munguar.
Kosova, nga ana tjetër, dëshiron që ky bashkëpunim të shërbejë si mbështetje në rrugën e saj drejt afrimit me Bashkimin Europian, duke e pozicionuar si një mundshëm kandidat për antarësim, thekson agjencia belge e lajmeve Belga./DW
