Sharm El-Sheikh, Egjipt – Presidenti i SHBA-së, Donald Trump, dhe homologu i tij egjiptian, Abdel Fattah el-Sisi, do të bashkë-kryesojnë të hënën samitin e paqes në Sharm El-Sheikh, ku pritet të nënshkruhet një marrëveshje për t’i dhënë fund luftimeve në Rripin e Gazës.
Në ceremoninë e nënshkrimit do të marrin pjesë edhe udhëheqës evropianë, përfshirë Presidentin e Këshillit Evropian António Costa, Emmanuel Macron të Francës, Keir Starmer të Mbretërisë së Bashkuar, Giorgia Meloni të Italisë, Pedro Sánchez të Spanjës, si dhe presidentin turk Recep Tayyip Erdogan. Samiti vjen pas hyrjes në fuqi të armëpushimit në Gaza të premten e kaluar.
Sipas presidencës egjiptiane, samiti synon të “i japë fund luftës në Rripin e Gazës, të rrisë përpjekjet për paqe dhe stabilitet në Lindjen e Mesme, dhe të shënojë një fazë të re të sigurisë rajonale”. Marrëveshja e arritur midis Izraelit dhe Hamasit do të nënshkruhet gjatë këtij takimi, por asnjë nga palët nuk do të marrë pjesë fizikisht në samit.
Të hënën në mëngjes, Hamasi pritet të lirojë pengje izraelitë në këmbim të lirimit të disa të burgosurve nga Izraeli, në përputhje me armëpushimin. Në të njëjtën kohë, Trump do të vizitojë Izraelin, ku do të mbajë një fjalim në Knesset, para se të shkojë në Sharm El-Sheikh për të marrë pjesë në samit.
Ndihmat humanitare po hyjnë përsëri në Rripin e Gazës, pasi Izraeli ka lejuar transportin e tyre, duke kërkuar respektimin e marrëveshjes së armëpushimit.
Presidenti i Këshillit Evropian António Costa do të përfaqësojë Bashkimin Evropian në ceremoninë e nënshkrimit. Zëdhënësi i tij tha se “plani ofron një shans të vërtetë për të ndërtuar një paqe të drejtë dhe të qëndrueshme, dhe BE është plotësisht e angazhuar për të mbështetur këto përpjekje dhe për të kontribuar në zbatimin e tij.”
