Kryetari i Komisionit Qendror të Zgjedhjeve (KQZ), Kreshnik Radoniqi, ka deklaruar se procesi i numërimit të votave për rundin e parë të zgjedhjeve lokale pritet të përmbyllet brenda kësaj jave.
Në një konferencë për media, Radoniqi njoftoi se nesër, duke filluar nga ora 12:00, dhe në disa komuna në ora 16:00, do të nisë numërimi i votave për kuvendet komunale në të gjitha 38 komunat e Kosovës.
Ai shtoi se pret që ky proces të përfundojë brenda dy deri në tre ditë, pas çka do të vazhdohet me numërimin e votave me kusht, të personave me nevoja të veçanta dhe të votave nga diaspora.
“Besojmë fuqishëm që brenda kësaj jave do të përfundojë procesi i numërimit”, tha Radoniqi.
Procesi i numërimit do të zhvillohet nën mbikëqyrjen e KQZ-së dhe vëzhguesve të akredituar, ndërsa rezultatet preliminare pritet të publikohen menjëherë pas përfundimit të këtij faze.
