Presidenti amerikan Donald Trump pritet të takohet të premten në Shtëpinë e Bardhë me homologun ukrainas Volodymyr Zelenskyy, në një takim që vjen pas muajsh tensioni dhe sinjaleve për një afrimitet të ri mes dy vendeve.
Sipas burimeve të POLITICO, takimi është konfirmuar nga një zyrtar i lartë ukrainas me njohuri të drejtpërdrejta mbi zhvillimet, ndërsa NBC News ishte e para që raportoi për planin. Ngjarja vjen vetëm një ditë pas një telefonate mes Trump dhe Zelenskyy, ku dy liderët diskutuan mundësinë që Kievi të blejë raketa Tomahawk – një armë që do t’i mundësonte Ukrainës të godiste objektiva ruse me më shumë saktësi dhe fuqi.
Kjo ide, që Trump e kishte hezituar më parë për shkak të frikës nga përshkallëzimi i konfliktit, duket se po rikthehet në agjendë, ndërsa ish-presidenti po ndryshon tonin ndaj Moskës.
Marrëdhëniet mes dy udhëheqësve janë ngrohur dukshëm që nga takimi i tensionuar në shkurt, kur Trump dhe zëvendëspresidenti JD Vance e kritikuan publikisht Zelenskyy-n për, siç thanë ata, mungesë mirënjohjeje ndaj ndihmës amerikane.
Tani, Trump ka braktisur qasjen e mëparshme pro-Putinit, duke e quajtur Rusinë “agresore” dhe duke pranuar se Ukraina mund të rikthejë territoret e humbura. Në një postim në Truth Social në shtator, ai e cilësoi Rusinë si “tigër letre”.
Nga ana tjetër, Zelenskyy në një intervistë për Fox News deklaroi se suksesi i Trump në ndërmjetësimin e armëpushimit në Gaza i ka dhënë besim se edhe paqja midis Ukrainës dhe Rusisë është e arritshme. Ai madje shtoi me humor se Çmimi Nobel për Paqe mund të ishte “në horizont” për Trump.
“Nëse ai e arrin këtë – shpresoj që po, dhe Zoti e bekoftë – ne do ta nominojmë dhe do të jemi krenarë ta përgëzojmë”, tha Zelenskyy.
