15 tetor 2025 | Prishtinë – Presidentja e Komisionit Evropian, Ursula von der Leyen, nuk mbajti konferencë për media pas takimeve me presidenten Vjosa Osmani dhe kryeministrin në detyrë Albin Kurti, duke thyer praktikën e zakonshme të vizitave vjetore të BE-së në vendet e Ballkanit Perëndimor.
Sipas zëdhënëses së Komisionit Evropian, Paula Pinho, arsyeja kryesore ishte fakti që në Kosovë dhe në Maqedoninë e Veriut janë zhvilluar ose pritet të zhvillohen zgjedhje, dhe BE synon të ruajë neutralitetin politik dhe të shmangë ndikimin në fushata zgjedhore.
“Arsyeja për mosmbajtjen e konferencës për media është për shkak të zgjedhjeve që janë në proces ose pritet të mbahen së shpejti, sipas praktikës së zakonshme,” tha Pinho.
Megjithatë, von der Leyen përcolli një mesazh të shkurtër për Kosovën, duke theksuar nevojën për institucione të forta, ulje të tensioneve dhe finalizim të hapave të nevojshëm për të përfituar nga Plani i Rritjes.
Zyra e Osmanit dhe ajo e Kurtit kanë bërë të ditur se gjatë takimeve u diskutuan çështje kyçe, si heqja e masave ndaj Kosovës, avancimi i procesit të aplikimit për BE, Plani i Rritjes dhe rruga e Kosovës drejt anëtarësimit në Union.
