Presidentja e Republikës së Kosovës, Vjosa Osmani, ka pritur sot në takim Kryemyftiun e Bashkësisë Islame të Kosovës (BIK), Naim Tërnava, me të cilin ka biseduar për rolin e BIK-ut në forcimin e pozitës ndërkombëtare të shtetit dhe ruajtjen e traditës së tolerancës ndërfetare në vend.
Gjatë takimit, Presidentja Osmani ka vlerësuar lart kontributin e Bashkësisë Islame në kultivimin e harmonisë ndërfetare, duke theksuar se kjo përbën një nga vlerat më të çmuara të shoqërisë kosovare dhe një model unik për rajonin.
Ajo ka nënvizuar rëndësinë e bashkëpunimit të vazhdueshëm ndërmjet institucioneve shtetërore dhe bashkësive fetare, si një element kyç për ndërtimin e një shoqërie të drejtë, gjithëpërfshirëse dhe të qëndrueshme.
