Një zhvillim i rëndësishëm në marrëdhëniet gjermano-turke po shënon një kthesë të madhe në fushën e mbrojtjes. Qeveria gjermane raportohet se është gati t’i japë fund vetos së saj të gjatë dhe të miratojë shitjen e avionëve luftarakë Eurofighter drejt Turqisë, duke hapur kështu një kapitull të ri në bashkëpunimin strategjik mes dy vendeve.
Sipas burimeve diplomatike, Berlini ka dhënë pëlqimin paraprak për kërkesën e kompanisë Airbus lidhur me shitjen e avionëve në Ankara, ndërsa pritet të nisin negociatat zyrtare për dorëzimin e pajisjeve.
Kjo çështje është një nga temat kryesore të diskutimit gjatë vizitës së Ministrit të Jashtëm gjerman, Johann Vandeful, në Ankara sot (17 tetor). Në një intervistë për gazetën turke Hurriyet, Vandeful deklaroi se Turqia luan një rol thelbësor në forcimin e aftësive mbrojtëse të NATO-s, ndërsa theksoi rëndësinë e bashkëpunimit ushtarak midis dy vendeve.
“Gjermania dhe Turqia përballen me sfida të përbashkëta në forcimin e kapaciteteve mbrojtëse të Aleancës. Ne besojmë se Turqia, si një aleate e rëndësishme, mund të forcojë fuqinë e saj parandaluese me ndihmën e Eurofighterëve. Kjo është në interesin tonë të përbashkët, pasi Turqia mbetet një partner strategjik kyç brenda NATO-s. Negociatat mbi detajet teknike janë ende në zhvillim,” – deklaroi Vandeful.
Programi Eurofighter Typhoon është një nga projektet më të avancuara të aviacionit ushtarak evropian, i zhvilluar në bashkëpunim nga Gjermania, Mbretëria e Bashkuar, Italia dhe Spanja. Çdo shitje në një vend të tretë kërkon miratimin e të katër shteteve partnere.
Turqia kishte marrë sinjale pozitive nga Londra dhe Madridi që në vitin 2022, por kundërshtimi i deritanishëm i Berlinit ka qenë pengesa kryesore për finalizimin e marrëveshjes.
Ankaraja planifikon të blejë 24 avionë Eurofighter në fazën e parë, me mundësi zgjerimi deri në 40 avionë në një fazë të dytë. Vlera e marrëveshjes, që përfshin trajnim, mbështetje teknike, pjesë rezervë dhe licenca softuerike, vlerësohet në rreth 6 miliardë dollarë.
Ky hap shihet si një sinjal politik i fuqishëm për përmirësimin e marrëdhënieve mes Berlinit dhe Ankarasë, të cilat vitet e fundit kanë qenë të tensionuara për çështje të sigurisë dhe politikës rajonale.
