Deputeti i Partisë Demokratike të Kosovës (PDK), Abelard Tahiri, ka folur për mediat para fillimit të seancës së jashtëzakonshme të Kuvendit, ku pritet të votohet formimi i qeverisë së re.
I pyetur nëse PDK-ja do të provojë formimin e qeverisë në rast të dështimit të mandatit të Albin Kurtit, Tahiri u shpreh se kjo çështje do të trajtohet në përputhje me procedurat kushtetuese.
“Ajo është çështje tjetër. Kjo seancë e jashtëzakonshme është thirrur për t’u parë nëse kryeministri në dorëheqje, Albin Kurti, ka shumicën parlamentare për formimin e qeverisë. Nëse ai dështon, atëherë normalisht që hapat e mëtejshëm do të ndiqen nga presidentja dhe partitë, sipas Kushtetutës,” deklaroi Tahiri.
Sipas tij, fokusi aktual është tek verifikimi i shumicës së Vetëvendosjes, ndërsa çdo vendim tjetër për hapat e PDK-së do të varet nga zhvillimet e seancës së sotme.
Kjo deklaratë vjen në një moment politik vendimtar, ku fati i qeverisë “Kurti 3” mbetet i pasigurt dhe partitë opozitare po vëzhgojnë nga afër mundësinë për të marrë rolin e mandatarit të ardhshëm, në rast se kryeministri aktual nuk arrin të sigurojë shumicën në Kuvend.
