Qytetarët dhe transportuesit ndërkombëtarë po përballen me vonesa të konsiderueshme në hyrjen në vendet e Bashkimit Evropian për shkak të zbatimit të sistemit të ri për regjistrimin e hyrjeve dhe daljeve (EES).
Shoferët e autobusëve raportojnë pritje që mund të zgjasin më shumë se dy orë. “Me 34 pasagjerë, qëndruam rreth dy orë e 40 minuta,” tha një shofer, duke theksuar se vonesat janë shumë më të gjata krahasuar me periudhën para aplikimit të sistemit, kur pritjet arrinin 15–20 minuta.
Sistemi EES parashikon regjistrimin automatik të qytetarëve nga vendet jashtë BE-së, duke përfshirë marrjen e katër gjurmëve të gishtërinjve, një fotografi të fytyrës dhe regjistrimin e të dhënave personale dhe të udhëtimit. Qëllimi afatgjatë është thjeshtimi i procedurave dhe ulja e kohës së pritjes në kufi.
Përvojat e transportuesve tregojnë se sistemi ndikon në oraret e udhëtimeve. “Nëse duhen 5–7 minuta për çdo pasagjer, do të ngadalësohet ndjeshëm kalimi i kufirit dhe orari për pjesën tjetër të udhëtimit,” tha pronarja e një kompanie autobusësh.
Aktualisht, sistemi EES është i vlefshëm në disa pika kufitare dhe aeroporte, dhe do të zgjerohet gradualisht derisa të jetë plotësisht funksional. Autoritetet po punojnë për të harmonizuar procedurat dhe për të reduktuar vonesat, por për momentin pritjet mbeten të gjata.
