Policia Federale e Gjermanisë (Bundespolizei) ka konfirmuar zyrtarisht se qytetarët e Kosovës, Shqipërisë, Bosnjë-Hercegovinës, Serbisë, Malit të Zi, Maqedonisë së Veriut dhe të vendeve të tjera joanëtare të Bashkimit Evropian nuk mund të përdorin korsitë e dedikuara për pasagjerët e BE/EWR/CH në pikat kufitare gjermane. Ata janë ende të detyruar të kalojnë nëpër korsinë e shënuar “Alle Pässe / Të gjitha Pasaportat”, ku kryhet kontrolli i plotë kufitar.
Vendimi bazohet në Kodin Kufitar të Shengenit dhe në rregullat që zbatohen në të gjitha shtetet anëtare të Bashkimit Evropian. Sipas këtij kuadri ligjor, vetëm qytetarët e BE-së, të vendeve të Zonës Ekonomike Evropiane (EEA/EWR) dhe të Zvicrës kanë të drejtë të përdorin korsitë e shënuara me mbishkrimin “EU/EWR/CH Bürger”. Të gjithë pasagjerët e tjerë — përfshirë edhe qytetarët e vendeve të Ballkanit Perëndimor që udhëtojnë me vizë ose me leje qëndrimi të vlefshme në një shtet të BE-së — duhet të hyjnë përmes korsisë “Të gjitha Pasaportat”, e cila është e detyrueshme për të gjitha shtetet e treta.
Autoritetet gjermane theksojnë se mbajtja e një vize ose lejeje qëndrimi në territorin e BE-së nuk e ndryshon statusin e një qytetari të një vendi të tretë, që do të thotë se ai nuk mund të përfitojë nga shërbimet e dedikuara për qytetarët e Bashkimit Evropian. Kjo rregull vlen njësoj në të gjitha pikat kufitare tokësore, detare dhe ajrore të Gjermanisë.
Bundespolizei sqaroi gjithashtu se futja në përdorim e sistemit të ri të Hyrjes/Daljes (EES) — që pritet të funksionojë së shpejti me kapacitet të plotë në të gjithë zonën Shengen — nuk ndryshon rregullat ekzistuese për shënimin e korsive të kontrollit kufitar. Sistemi EES synon vetëm të modernizojë procesin e regjistrimit të hyrjeve dhe daljeve të udhëtarëve nga vendet joanëtare të BE-së, pa ndikuar në mënyrën se si organizohet trafiku i pasagjerëve në pikat kufitare.
Me këtë sqarim, policia gjermane i jep fund keqkuptimeve që kanë qarkulluar ditëve të fundit në mediat sociale mbi mundësinë që qytetarët e vendeve të Ballkanit të përdorin korsitë e BE-së në aeroportet dhe kufijtë gjermanë.
