Republika Arabe e Sirisë ka njohur zyrtarisht pavarësinë e Republikës së Kosovës, në një zhvillim të rëndësishëm diplomatik të arritur gjatë vizitës së Presidentes Vjosa Osmani në Riad.
Kjo marrëveshje historike u arrit me mbështetjen e Princit të Kurorës së Arabisë Saudite, Muhammed bin Salman Al Saud, i cili luajti rol ndërmjetësues në afrimin e dy shteteve.
“Me mbështetjen e Lartësisë së Tij Mbretërore, Princit të Kurorës së Arabisë Saudite, sot në Riad arritëm marrëveshjen nëpërmjet së cilës Republika Arabe e Sirisë njeh Republikën e Kosovës,” — shkroi Osmani në një postim në Facebook.
Presidentja e falënderoi Presidentin sirian Al Sharaa për vendimin për njohjen e Kosovës dhe për mbështetjen e dhënë ndaj popullit kosovar.
“Populli i Kosovës dhe ai i Sirisë kanë vuajtur e sakrifikuar shumë për ta arritur lirinë. Kjo njohje nuk është vetëm njohje e sovranitetit shtetëror, por edhe e sakrificës së shumë brezave për të jetuar të lirë,” — shtoi Osmani.
Kjo është njohja e 120-të ndërkombëtare e shtetit të Kosovës, e cila, sipas Osmanit, shënon një moment historik për diplomacinë e vendit.
“Republika jonë po ecë përpara dhe nuk ka asgjë që mund ta ndalë!” — përfundoi Presidentja.
Njohja nga Siria shihet si një përparim i madh në politikën e jashtme të Kosovës, duke zgjeruar ndikimin e saj në Lindjen e Mesme dhe forcuar përkrahjen e partnerëve ndërkombëtarë në rrugëtimin drejt anëtarësimit në organizatat ndërkombëtare.
