Presidenti amerikan Donald Trump ka njoftuar se do të vizitojë Kinën në muajin prill, pas një takimi që zhvilloi në Korenë e Jugut me presidentin kinez Xi Jinping. Pas vizitës së tij në Pekin, pritet që edhe presidenti Xi të udhëtojë drejt Shteteve të Bashkuara, në kuadër të përpjekjeve për thellimin e marrëdhënieve dypalëshe.
Gjatë takimit, dy liderët janë pajtuar të bashkëpunojnë për t’i dhënë fund luftës në Ukrainë, ndërsa Trump njoftoi gjithashtu uljen e tarifave tregtare ndaj Kinës, nga 57% në 47%.
Një zyrtar amerikan që shoqëronte presidentin Trump konfirmoi se Pekini do të vazhdojë eksportet e metaleve të rralla tokësore, materiale me rëndësi strategjike për industrinë e teknologjisë dhe prodhimin e pajisjeve elektronike.
Në stilin e tij karakteristik, Trump e cilësoi takimin me Xi-n si “të jashtëzakonshëm”, duke shtuar me humor se “në një shkallë nga 1 në 10, do t’i jepte 12 pikë”.
Kjo vizitë e paralajmëruar shihet si një hap i rëndësishëm drejt shkrirjes së akujve tregtarë dhe politikë mes dy ekonomive më të mëdha në botë.
