Presidenti amerikan Donald Trump ka kërkuar nga drejtuesit ushtarakë të Shteteve të Bashkuara të rifillojnë testimet e armëve bërthamore, duke argumentuar se vendi duhet të mbajë ekuilibrin strategjik me programet bërthamore të Rusisë dhe Kinës, raporton BBC.
“Për shkak të programeve të testimeve të vendeve të tjera, kam udhëzuar Departamentin e Luftës që të nisë testimet e armëve tona bërthamore në të njëjtën bazë,” shkroi Trump në rrjetet sociale, pak para takimit me presidentin kinez Xi Jinping në Korenë e Jugut.
Trump theksoi se Shtetet e Bashkuara zotërojnë më shumë armë bërthamore se çdo vend tjetër, me Rusinë në vend të dytë dhe Kinën “shumë më poshtë”. SHBA nuk ka kryer asnjë test bërthamor që nga viti 1992, kur ish-presidenti George H. W. Bush shpalli moratoriumin pas përfundimit të Luftës së Ftohtë.
Deklarata e Trump vjen vetëm disa ditë pasi ai dënoi Rusinë për testimin e një rakete me energji bërthamore, e cila raportohet se ka rreze të pakufizuar veprimi. Në postimin e tij, ai pranoi “fuqinë shkatërruese të jashtëzakonshme” të armëve bërthamore, por shtoi se nuk kishte “asnjë zgjedhje tjetër” veçse të modernizonte arsenalin amerikan.
Trump paralajmëroi gjithashtu se programi bërthamor i Kinës mund të arrijë në të njëjtin nivel me SHBA-në brenda pesë vitesh. Edhe pse nuk dha detaje për mënyrën se si do të zhvillohen testimet, ai konfirmoi se “procesi do të nisë menjëherë”.
Ky veprim shënon një kthesë të fortë nga politika e deritanishme amerikane, që kishte ndaluar testimet bërthamore për më shumë se tri dekada.
