Akademiku dhe shkrimtari i njohur Rexhep Qosja ka reaguar me një mesazh prekës pas ndarjes nga jeta të ish-kryeministrit dhe liderit historik të Partisë Socialiste, Fatos Nano, duke e cilësuar atë si “një nga figurat më të gjithanshme të jetës publike shqiptare”.
Në një postim në Facebook, Qosja shkruan se lajmi për vdekjen e Nanos i ka sjellë “një trishtim të heshtur”, por edhe kujtesën e një kohe që, sipas tij, “shënoi zhvillimin e shtetit shqiptar drejt vetëdijes së tij të fuqishme politike”.
“Fatos Nano ishte një nga figurat më të gjithanshme të jetës publike shqiptare — politikan me kulturë të gjerë, polemist me mendim të vendosur që nuk i fshihte as pasionin, as kontradiktat e veta,” – shkruan Qosja.
“Në të shquhej një përmbajtje mendore e vendimmarrëse që i mungon politikës së sotme: ai thoshte, lexonte, dyshonte — cilësi këto të rralla në një botë politike që shpesh shpreh bindje pa vendime!”
Duke reflektuar mbi rolin e Nanos në historinë e tranzicionit shqiptar, Qosja thekson se ai do të kujtohet si njeriu që “përpiqej të krijonte një raport të ri midis socializmit dhe demokracisë, midis traditës dhe modernitetit, midis njeriut të lirë dhe shtetit të përgjegjshëm”.
Në përmbyllje të reagimit, akademiku shprehet me tone të forta emocionale:
“Sot, me largimin e tij, mbyllet një kapitull i gjithanshëm e i gjatë i shndërrimeve në jetën tonë historike — i njerëzve që e nisën politikën si mision. Fatos Nano shkoi, por mbeti shëmbëlltyra e tij historikisht e amshuar, si dëshmi e një kohe në të cilën ai bënte çmos që të ndërtonte lirinë e shtetit për të gjithë, përmes arsyes socialiste, demokratike e gjithëkombëtare.”
Fatos Nano ndërroi jetë më 31 tetor, duke lënë pas një trashëgimi të gjerë politike që shënoi mbi një dekadë të jetës shtetërore dhe parlamentare të Shqipërisë.
