Gjykata Speciale ka njoftuar se Trupi Gjykues ka shqyrtuar disa kërkesa të Mbrojtjes së ish-presidentit Hashim Thaçi, që lidhen me dëshminë e planifikuar të Wesley Clark (1DW-007).
Sipas njoftimit, pas konsultimeve me palët, është vendosur që dëshmia e Clark të nisë më 18 nëntor pasdite. Për shkak të kohës së nevojshme të parashikuar për dëshminë, Trupi Gjykues ka miratuar kërkesën e Mbrojtjes për të shtuar një ditë shtesë seance, e cila do të mbahet më 21 nëntor, me qëllim që dëshmia të përmbyllet në mënyrë “sa më të shpejtë dhe efikase”.
“Trupi Gjykues deklaroi se kjo ditë shtesë ishte rezervuar për të përmbyllur në mënyrë të shpejtë dhe të efektshme paraqitjen e argumenteve nga Mbrojtja, por i kërkoi palëve që të përpiqen ta përfundojnë dëshminë më herët nëse është e mundur”, thuhet në njoftimin e Gjykatës Speciale.
Ndërkohë, për javën e ardhshme, seanca e radhës do të mbahet të hënën, më 10 nëntor 2025, nga ora 14:00 deri në 17:00.
