Një ngjarje e rëndë ka tronditur sot komunën e Malishevës. Dy persona janë vrarë me armë zjarri në fshatin Gullbovc, ndërsa si autor i dyshuar është identifikuar Astrit Isufi nga Sankovci i Drenasit.
Sipas informacioneve fillestare, viktimat janë dy vëllezër, të moshave rreth 32 dhe 45 vjeç, që u qëlluan me armë zjarri para shtëpisë së tyre.
Motivi dhe dinamika e ngjarjes
Dyshohet se ngjarja ka ndodhur për shkaqe familjare, që kishin nisur më herët mes palëve. Hetimet paraprake tregojnë se i dyshuari kishte shkuar në shtëpinë e viktimave për të marrë gruan e tij, por pas largimit u kthye përsëri dhe hapi zjarr ndaj dy vëllezërve që ndodheshin para derës së shtëpisë.
Njëri prej tyre ka ndërruar jetë në vend, ndërsa tjetri rrugës për në spital.
Burimet po ashtu bëjnë të ditur se edhe vëllai i të dyshuarit kishte pasur konflikte të mëhershme me viktimat, çka dyshohet se ka ndikuar në përshkallëzimin e situatës.
Policia në vendngjarje – autori në kërkim
Forcat e Policisë dhe Prokurorisë ndodhen në vendngjarje. Trupat e viktimave do të dërgohen për ekzaminim mjeko-ligjor, ndërsa i dyshuari është ende në arrati.
“Janë duke u zhvilluar veprime të shpejta operative për kapjen e tij,” konfirmojnë burime të hetimit.
Hetimet janë në vazhdim.
