Kryetari i Komunës së Drenasit, Ramiz Lladrovci, është takuar të enjten me Albulena Haxhiun, nënkryetaren e Kuvendit të Kosovës nga radhët e Lëvizjes Vetëvendosje.
Në një prononcim për VOX Kosova, Lladrovci ka konfirmuar takimin, duke theksuar se bëhej fjalë për një drekë me karakter personal.
“Po, sot kam drekuar me znj. Haxhiu, në ‘Blinajë’, në Fushticë, dhe ishte drekë e lidhur me çështje krejt personale. Besoj e dini se gjyshin e saj, Bacën Ahmet, e kam pasur mik dhe njeri shumë të besueshëm gjatë kohës së ilegales, prandaj është çështje personale”,
tha Lladrovci për VOX Kosova.
Takimi mes dy zyrtarëve vjen në një kohë kur skena politike kosovare po përballet me zhvillime të shumta, megjithatë kryetari i Drenasit theksoi se nuk është diskutuar asnjë temë politike gjatë këtij takimi.
