Trajneri i Kombëtares shqiptare, Sylvinho, ka publikuar listën e 25 lojtarëve të grumbulluar për dy ndeshjet e fundit të kualifikueseve të Kupës së Botës 2026, ndaj Andorrës dhe Anglisë.
Në konferencën për shtyp, tekniku brazilian i bëri thirrje ekipit të qëndrojë me “këmbë në tokë” dhe të fokusohet vetëm te sfida e parë, duke e cilësuar ndeshjen me Andorrën “shumë të vështirë”.
Shqipëria, në garë për play-off
Kuqezinjtë ndodhen aktualisht në vendin e dytë të Grupit K me 11 pikë, një më shumë se Serbia, dhe kanë shanse reale për kualifikimin në play-off.
Në rast se Shqipëria fiton në Andorra dhe Serbia humb në Londër ndaj Anglisë, ekipi i Sylvinhos do të sigurojë biletën për fazën tjetër.
Grumbullimi i Kombëtares nis të hënën, më 10 nëntor, në Barcelonë, ku skuadra do përgatitet për ndeshjen e parë ndaj Andorrës më 13 nëntor (ora 20:45) në stadiumin Estadi FAF Encamp.
Takimi i fundit i grupit do të luhet më 16 nëntor (ora 18:00) në “Air Albania” kundër Anglisë, tashmë e kualifikuar.
Në deklaratën e tij për mediat, Sylvinho paralajmëroi që sfida e parë është shumë delikate:
“Kam shumë respekt për Andorrën. Ata nuk dorëzohen kurrë. Luajnë fort në mbrojtje dhe japin shpirtin në fushë. Barazuan me Letoninë dhe ishin pranë pikëve ndaj Serbisë. Do të jetë një ndeshje shumë e vështirë.”
Trajneri shtoi se nuk dëshiron të bëjë llogari për golavarazhin apo kombinimet me Serbinë:
“Nuk bëj llogari. Dua vetëm që të fitojmë ndeshjen e radhës.”
Në listën e publikuar, spikasin rikthimi i Armando Brojës dhe ftesa për Nedim Bajramin, pavarësisht mungesës së minutave me Rangers.
Sylvinho e justifikoi zgjedhjen me statistikat e Bajramit:
“Ai është golashënuesi ynë më i mirë me 7 gola. Edhe pse nuk po luan, na ka dhënë shumë dhe ka rëndësi për këtë grup.”
Ndërkohë, mungesa e Ernest Muçit dhe Nazmi Gripshit lidhet me mungesën e formës dhe minutave.
“Gripshi është me pushime në kampionatin e tij. Ne kemi dërguar manual stërvitjeje, por tani kemi nevojë për futbollistë aktivë,” shpjegoi Sylvinho.
Në listë është përfshirë edhe Medon Berisha, i cili po aktivizohet rregullisht në Serie A me Veronën:
“Berisha po fiton përvojë, po shënon dhe po rritet si fantazist. Ai është e ardhmja e Kombëtares.”
Trajneri u shpreh i kënaqur për rikthimin e Ardian Ismajlit pas dëmtimit dhe për formën e mirë të Indrit Tucit:
“Jam shumë i lumtur për Ismajlin, po merr minuta në Torino. Tuci na jep shumë alternativa në sulm.”
Lista e plotë e Kombëtares për ndeshjet e nëntorit
Portierë: Thomas Strakosha, Mario Dajsinani, Simon Simoni
Mbrojtës: Elseid Hysaj, Ivan Balliu, Mario Mitaj, Naser Aliji, Ardian Ismajli, Berat Gjimshiti, Arlind Ajeti, Klisman Cake
Mesfushorë: Ylber Ramadani, Juljan Shehu, Kristjan Asllani, Medon Berisha, Qazim Laçi, Adrion Pajaziti, Nedim Bajrami, Arbër Hoxha, Jasir Asani
Sulmues: Armando Broja, Myrto Uzuni, Rey Manaj, Mirlind Daku, Indrit Tuci
Shqipëria do të përpiqet të shkruajë një tjetër faqe historike në rrugën drejt Botërorit 2026, që do të mbahet në SHBA, Kanada dhe Meksikë.
Sylvinho dhe stafi i tij i kanë cilësuar këto dy ndeshje si “finalet e para të një rrugëtimi të ri”, me synimin për të rikthyer Kombëtaren në arenën më të madhe të futbollit botëror.
