Autoritetet izraelite konfirmuan të premten në mbrëmje se kanë marrë trupin e një pengu tjetër nga lëvizja palestineze Hamas, përmes ndërmjetësimit të Komitetit Ndërkombëtar të Kryqit të Kuq (KNKK), raportoi agjencia franceze e lajmeve AFP.
Sipas njoftimit, identiteti i viktimës do të përcaktohet përmes analizave mjeko-ligjore, ndërsa autoritetet izraelite nuk kanë dhënë ende hollësi mbi rrethanat e dorëzimit.
Në përputhje me armëpushimin e tetorit, Hamasi kishte liruar më herët 20 pengje ende gjallë, në këmbim të disa qindra të burgosurve palestinezë. Nga 28 pengje të vrarë, lëvizja islamiste ka kthyer deri tani eshtrat e 22 prej tyre.
Sipas marrëveshjes që hyri në fuqi më 10 tetor, Izraeli është zotuar të kthejë 15 trupa palestinezë për çdo trup të një pengu që i dorëzohet nga Hamasi në Rripin e Gazës — një praktikë që ka ngjallur debate të ashpra brenda vendit dhe në arenën ndërkombëtare.
