Në disa provinca të Austrisë, punëtorët që udhëtojnë çdo ditë me makinë drejt vendit të punës do të përfitojnë nga rritja e subvencioneve dhe zgjerimi i kritereve të përfshirjes. Nga viti 2026, pritet që numri i përfituesve të zgjerohet ndjeshëm, ndërsa shuma maksimale e kompensimit mund të arrijë deri në 1,200 euro në vit.
Në Austrinë e Poshtme, autoritetet kanë njoftuar rritje të pragjeve të të ardhurave që përcaktojnë të drejtën për përfitim të subvencioneve, duke iu përgjigjur rritjes së kostove të jetesës. Kështu, nga janari 2026, përfitimet do të jenë të hapura për më shumë punëtorë. Për familjet e vetme, kufiri mujor bruto do të ngjitet në 2,200 euro (nga 2,000 më parë), ndërsa për prindërit beqarë me një fëmijë ose çiftet e pamartuara limiti do të jetë 3,960 euro. Për familjet me një fëmijë ose më shumë, kufiri do të arrijë 4,840 euro, me 880 euro shtesë për çdo fëmijë tjetër.
Kushti themelor për përfitim mbetet që aplikuesit të kenë vendbanimin e tyre kryesor në Austrinë e Poshtme dhe të udhëtojnë të paktën 25 kilometra vajtje-ardhje deri në vendin e punës. Aplikimi do të bëhet vetëm në internet, dhe punëtorët që përdorin transportin publik do të përfitojnë një eko-bonus prej 20% mbi shumën bazë.
Sipas portalit Finanz.at, kompensimi bazohet në distancën ditore të udhëtimit, duke llogaritur 4 euro për çdo kilometër vajtje-ardhje në ditë. Shuma maksimale e subvencionit është 1,000 euro në vit, ndërsa me eko-bonusin mund të arrijë 1,200 euro.
Ndërkohë, edhe provinca të tjera të Austrisë ofrojnë përfitime të ngjashme:
-
Në Austri të Epërme, pagesa për udhëtim varion nga 218 deri në 421 euro, në varësi të distancës, dhe aplikimet janë të hapura deri më 28 shkurt 2026.
-
Në Steiermark, kompensimi mund të shkojë deri në 389 euro në vit, me aplikime të vlefshme deri më 31 dhjetor 2025. Kjo pagesë jepet për ata që kanë të ardhura nën 35,000 euro në vit dhe udhëtojnë të paktën 25 kilometra vajtje-ardhje.
-
Në Karinthi, përfituesit mund të marrin deri në 825 euro, me kushte që përfshijnë të ardhura vjetore deri në 31,680 euro për përdoruesit e makinës dhe 35,000 euro për përdoruesit e transportit publik.
Subvencionet mund të kërkohen përmes faqeve zyrtare të dhomave të punës të secilës provincë, dhe shumica paguhen në mënyrë retroaktive për vitin e kaluar kalendarik.
Në një kohë kur kostoja e karburantit dhe e jetesës në Austri është në rritje të vazhdueshme, këto masa synojnë të lehtësojnë barrën ekonomike të punëtorëve që udhëtojnë çdo ditë, duke promovuar njëkohësisht përdorimin e transportit publik dhe efikasitetin ekologjik në lëvizjen drejt vendit të punës.
