Qytetarët e Kosovës, Shqipërisë, Maqedonisë së Veriut, Serbisë, Malit të Zi dhe Bosnjë-Hercegovinës do të përballen me një rregull të ri kur të udhëtojnë drejt vendeve të Bashkimit Evropian dhe zonës Shengen.
Ministria e Brendshme Kroate ka sqaruar se, me futjen e sistemit të ri të hyrjes dhe daljes (EES) më 12 tetor, nuk është vendosur ndonjë tarifë e re — vetëm procedura e regjistrimit është bërë më e avancuar, duke përfshirë skanimin e pasaportës, fotografimin dhe gjurmët e gishtërinjve.
Megjithatë, nga gjysma e dytë e vitit 2026 do të hyjë në fuqi Sistemi Evropian i Informacionit dhe Autorizimit të Udhëtimit (ETIAS), i cili do të kërkojë nga shtetasit e këtyre vendeve të marrin autorizim udhëtimi para hyrjes në BE për qëndrime afatshkurtra.
Kostoja e aplikimit për ETIAS do të jetë 20 euro për çdo aplikim, ndërsa personat nën 18 vjeç dhe mbi 70 vjeç do të jenë të përjashtuar nga pagesa.
Autorizimi, pasi të miratohet, do të jetë i vlefshëm për 3 vjet, përveç rasteve kur pasaporta skadon më herët. Gjatë kësaj periudhe, udhëtarët nuk do të kenë nevojë ta rinovojnë apo ta paguajnë sërish për çdo udhëtim.
Ky sistem i ri synon rritjen e sigurisë kufitare dhe kontroll më efikas të hyrjeve në zonën Shengen, pa rikthyer regjimin e vizave për qytetarët e vendeve të Ballkanit Perëndimor.
