Kosova do të përfundojë javën me mot të qëndrueshëm dhe kryesisht me diell. E premtja pritet të sjellë temperatura më të larta, sidomos gjatë orëve të mesditës, ndërsa mëngjesi do të jetë i ftohtë në shumë zona të vendit.
Sipas parashikimeve meteorologjike, temperatura minimale do të zbresë deri në -1 gradë Celsius, veçanërisht në zonat e ulëta dhe ato me mjegull të dendur. Megjithatë, dita do të jetë stabile dhe e ngrohtë, me temperatura maksimale që mund të arrijnë deri në 17 apo edhe 18 gradë Celsius.
Edhe në Shqipëri, Maqedoninë e Veriut, Luginën e Preshevës dhe Mal të Zi parashikohet mot i ngjashëm – diell, pak vranësira lokale dhe mëngjes i ftohtë me mjegull në disa vise kontinentale.
Pas mëngjesit të ftohtë, dita do të dominohet nga kthjellimet dhe rritja graduale e temperaturave, duke krijuar kushte ideale për fundjavën që po afrohet.
