Nga janari i vitit 2026, ndihma për fëmijë në Gjermani do të rritet sërish, duke sjellë më shumë mbështetje financiare për miliona familje. Krahas saj, do të ketë edhe rritje të kredive tatimore dhe lehtësime shtesë për prindërit.
Sipas njoftimit të Ministrisë Gjermane të Familjes dhe raportimeve të Tagesschau, ndihma mujore për çdo fëmijë do të rritet nga 255 në 259 euro, pra katër euro më shumë se viti i kaluar. Kjo do të ndodhë automatikisht, pa nevojën që prindërit të aplikojnë.
Për shembull, një familje me dy fëmijë dhe të ardhura vjetore prej 60,000 eurosh do të përfitojë rreth 306 euro më shumë në vit.
Ndihma për fëmijë në Gjermani u rrit për herë të fundit në fillim të vitit 2025 me pesë euro, ndërsa vendimi i ri u miratua nga Bundestagu që në dhjetor 2024, pavarësisht përfundimit të koalicionit “semafor”.
Ndihma u takon të gjithë prindërve me fëmijë deri në moshën 18 vjeç, si dhe për ata që ndjekin shkollën deri në moshën 25 vjeç, apo që janë të papunë deri në moshën 21 vjeç.
Së bashku me këtë rritje, zbritja tatimore për fëmijët (Kinderfreibetrag) do të rritet nga 6,672 në 6,828 euro në vit, ndërsa ndihma për fëmijët e familjeve me të ardhura të ulëta do të shkojë nga 20 në 25 euro në muaj.
Edhe zbritja bazë personale për llogaritjen e tatimit mbi të ardhurat do të rritet në 12,096 euro në vit, që do të thotë 312 euro më shumë. Një tjetër rritje e vogël pritet në vitin 2027 me 252 euro shtesë.
Këto masa synojnë të zbusin efektin e “progresionit të ftohtë”, një fenomen ku pagat rriten për shkak të inflacionit, por taksat rriten në mënyrë më disproporcionale, duke zvogëluar fuqinë reale blerëse të qytetarëve.
Sipas vlerësimeve të Ministrisë së Financave, kostoja për shtetin dhe tokat federale do të jetë e lartë – rreth 7.2 miliardë euro në vitin 2025 dhe deri në 14.8 miliardë euro në vitet e ardhshme.
Shtetet federale pritet të humbasin rreth 5.4 miliardë euro të ardhura në vit, për shkak të këtyre lehtësimeve.
Zbatimi përfundimtar i masave kërkon ende miratimin e Bundesratit, që pritet të votojë më 31 nëntor 2025.
