Uashingtoni po shtyn me ngulm që Këshilli i Sigurimit të miratojë planin e ri për Gazën, duke paralajmëruar se palestinezët mund të përballen me “pasoja të rënda” nëse rezoluta nuk kalon shpejt. Rusia, ndërkohë, ka kundër-propozimin e saj, duke sfiduar drejtpërdrejt versionin amerikan.
Drafti amerikan parashikon një Bord Paqeje të udhëhequr nga Presidenti Trump deri në fund të 2027-ës dhe një Forcë Ndërkombëtare Stabilizimi (ISF) me 20,000 trupa, pa praninë e ushtrisë amerikane. Qëllimi: çmilitarizimi i Gazës, mbrojtja e civilëve dhe hapja e korridoreve humanitare.
Uashingtoni thotë se ka diskutime me Indonezinë, Emiratet, Egjiptin, Katarin, Turqinë dhe Azerbajxhanin për të kontribuar trupa, por hezitimi mbetet i madh nga frika e një përplasjeje të drejtpërdrejtë me Hamasin.
Versioni i ri i rezolutës përmend edhe një shtet palestinez në të ardhmen, me kusht që Autoriteti Palestinez të përmbushë reformat. SHBA thotë se do të ndërmjetësojë një dialog të ri izraelito-palestinez.
Por drafti është ende i paqartë për mekanizmat e mbikëqyrjes, rolin e AP-së dhe detajet e plota të misionit ISF – pikërisht aty ku Rusia po godet me kundër-projektin e saj, duke kërkuar një qasje “më të ekuilibruar”.
Kjo përplasje vjen teksa armëpushimi mes Izraelit dhe Hamasit vazhdon të lëkundet, me sulme të përditshme izraelite që e kanë shkelur disa herë marrëveshjen.
SHBA kërkon që KS i OKB-së të veprojë tani, duke e cilësuar momentin si “historik”.
