Luftimet në Ukrainë po hyjnë në një fazë të re të tensionuar, ndërsa forcat ruse pretendojnë se kanë rrethuar plotësisht trupat ukrainase në qytetin Dimitrov të rajonit të Donetskut. Eksperti ushtarak Andrey Marochko tha për agjencinë TASS se “rrethimi pranë Dimitrovit është praktikisht i mbyllur dhe forcat ukrainase janë të bllokuara pa mundësi tërheqjeje”.
Sipas burimeve ruse, ofensiva e fundit ka konsoliduar pozicionet e Moskës në zonën juglindore, ndërsa Kievi ende nuk ka komentuar mbi pretendimet për rrethim. Fronti i Donetskut mbetet një nga pikat më të përgjakshme të luftës, me beteja të pandërprera për kontrollin e qyteteve industriale që kanë rëndësi strategjike për të dyja palët.
Ndërkohë, një tjetër zhvillim që mund të ndikojë ndjeshëm në ecurinë e konfliktit është rënia drastike e furnizimeve me municione nga Koreja e Veriut drejt Rusisë. Sipas një interviste të dhënë për Reuters nga Vadym Skibitskyi, zëvendësdrejtor i inteligjencës ushtarake ukrainase, Pheniani ka më shumë se përgjysmuar dërgesat e predhave të artilerisë në krahasim me vitin 2024, për shkak të pakësimit të rezervave të veta.
“Dërgesat e miliona predhave nga Koreja e Veriut ndihmuan Rusinë të ruante një intensitet të lartë zjarri gjatë vitit të kaluar, por këtë vit volumi është më shumë se përgjysmuar,” deklaroi Skibitskyi. Ai shtoi se Pheniani ka filluar gjithashtu prodhimin e dronëve sulmues, me qëllim për t’i ofruar Moskës forma alternative mbështetjeje ushtarake.
Sipas analistëve ndërkombëtarë, ky zhvillim mund të dobësojë aftësinë e Rusisë për të mbajtur të njëjtën shkallë intensive të bombardimeve në vijat e frontit, sidomos në lindje dhe jug të Ukrainës, ku betejat për territor mbeten të ashpra.
