Sonte, Kosova zbret në fushë kundër Sllovenisë në një nga ndeshjet më të rëndësishme në historinë e saj që prej pranimit në UEFA. Dardanët kërkojnë fitoren e madhe prej tre pikësh, që do t’i shtynte një hap më afër Kupës së Botës 2026, por edhe një barazim në Ljublanë do të mjaftonte për të siguruar Play Off-in.
Ekipi i trajnerit Franco Foda hyn në këtë sfidë pa asnjë mungesë të rëndësishme nga lëndimet, çka e bën formacionin e plotë dhe të gatshëm për një ndeshje vendimtare. Në anën tjetër, Sllovenia pritet të jetë pa yllin e Manchester United-it, Benjamin Sesko, mungesë që mund të peshojë rëndë në sulmin e vendasve.
Në prag të takimit, trajneri Foda dhe kapiteni Vedat Muriqi shprehën besimin se Kosova është gati për një rezultat historik.
“Ne besojmë në forcën tonë dhe në karakterin e këtij ekipi. Do të luftojmë deri në fund për t’i bërë krenarë tifozët tanë,” u shpreh Muriqi, ndërsa trajneri Foda theksoi rëndësinë e përqendrimit dhe disiplinës taktike kundër një kundërshtari që di të shfrytëzojë çdo hapësirë.
Për Dardanët, kjo është nata e provës së madhe, ajo që mund të vulosë përfundimisht ngritjen e futbollit kosovar në arenën botërore.
