Në një “Air Albania” plot me 22 mijë tifozë, Shqipëria u mposht 0–2 nga Anglia, në ndeshjen e fundit të Grupit K për Kualifikueset e Kupës së Botës 2026.
Dy golat e Harry Kane (74’, 82’) vendosën fatin e takimit, duke vulosur një tjetër fitore të “Tre Luanëve” ndaj kuqezinjve — të tetën në po aq përballje historike.
Megjithë humbjen, Shqipëria e Sylvinhos e mbyll grupin në vendin e dytë me 14 pikë, duke siguruar fazin play-off, ku më 20 nëntor do të mësojë kundërshtarin për ndeshjen gjysmëfinale që do të luhet më 26 mars 2026.
Anglia, nga ana tjetër, si fituese e grupit, e ka siguruar tashmë biletën për finalet që do zhvillohen në Amerikën e Veriut verën e ardhshme.
Si u zhvillua ndeshja:
Kuqezinjtë e nisën fort, me Arbër Hoxhën protagonist absolut. Ai krijoi disa raste të pastra, përfshirë një “penallti në lëvizje” në minutën e 51-të që u ndal nga portieri Henderson.
Në pjesën e parë, Hysaj u detyrua të largohej i dëmtuar, ndërsa Strakosha mbajti ekipin në lojë me disa pritje vendimtare ndaj Bowen dhe Eze.
Në minutën e 74-t, pas një krosimi nga këndi dhe devijimi të pafat të Alijit, topi përfundoi te Kane, që e dërgoi në rrjetë nga afër.
Vetëm tetë minuta më vonë, kapiteni anglez realizoi sërish, këtë herë pas një asisti të Marcus Rashford, duke vulosur rezultatin përfundimtar 0–2.
Fund i hidhur për Brojën
Në minutën e 89-të, sulmuesi Armando Broja, që sapo kishte hyrë në fushë, pësoi një dëmtim të rëndë në kaviljen e djathtë dhe u largua me barelë mes dhimbjesh e lotësh.
Gjendja e tij do të vlerësohet pas ekzaminimeve mjekësore në ditët në vijim.
Bilanci historik:
-
8 ndeshje, 8 fitore për Anglinë
-
23 gola të shënuar nga anglezët, vetëm 1 nga Shqipëria (Altin Rraklli, 2001)
-
Rezultati i sotëm: Shqipëri 0–2 Angli (Kane 74’, 82’)
Objektivi arritur
Edhe pse seria e 8 ndeshjeve pa humbje për Shqipërinë u ndërpre, ekipi kombëtar ka arritur objektivin kryesor — fazën play-off dhe mbyll një fushatë solide, duke lënë pas Serbinë, Letoninë dhe Andorrën.
Tani e gjithë vëmendja zhvendoset te shorti i UEFA-s, që do përcaktojë rrugën për ëndrrën e madhe: Botërori 2026.
