Prokuroria Speciale e Republikës së Kosovës ka dorëzuar në Gjykatën Themelore në Prishtinë aktakuzë ndaj tre personave, të dyshuar për disa vepra penale të rënda, përfshirë mashtrimin, detyrimin, kallëzimin e rremë dhe armëmbajtjen pa autorizim.
Sipas aktakuzës, i pandehuri K.K. gjatë viteve 2023–2024 ka përfituar në mënyrë të kundërligjshme 485 mijë euro, duke mashtruar të dëmtuarin E.N. për një marrëveshje joformale lidhur me shitjen e disa banesave. Megjithëse marrëveshja ishte arritur, shitja nuk është kryer. K.K. akuzohet për mashtrim, tentim-detyyrim dhe armëmbajtje pa leje.
I pandehuri A.M. ngarkohet me armëmbajtje pa leje dhe kallëzim të rremë, pasi sipas Prokurorisë, ka bërë një lajmërim të pavërtetë ndaj të dëmtuarit E.N.
Ndërsa D.M. akuzohet se ka kanosur E.N. me qëllim përfitimi të kundërligjshëm pasuror, duke tentuar ta detyrojë të veprojë në dëm të pasurisë së vet.
Prokuroria ka kërkuar që çështja të procedohet në gjykim, ndërsa hetimet konsiderohen të kompletuara.
