Universiteti “Haxhi Zeka” në Pejë po e forcon dukshëm pozitën e tij në sistemin e arsimit të lartë në Kosovë. Sipas rezultateve të fundit të “Kosovo National H-index” për tremujorin e katërt të vitit 2025, UHZ renditet i dyti ndër universitetet publike në vend, duke shënuar një progres të qartë në performancën e tij kërkimore dhe akademike.
Kjo arritje merr edhe më shumë peshë kur merret parasysh fakti se universiteti operon me kapacitete të kufizuara kërkimore dhe me një numër më të vogël të stafit akademik. Pavarësisht kësaj, përkushtimi i stafit, puna e vazhdueshme dhe qasja profesionale kanë prodhuar rezultate që jo vetëm përmbushin, por shpesh edhe tejkalojnë pritshmëritë, duke e pozicionuar UHZ-në si një institucion që sfidon çdo kufizim.
Rritja në renditje lidhet drejtpërdrejt me zgjerimin e kapaciteteve shkencore të universitetit, rritjen e publikimeve në Scopus dhe Web of Science, prezencën më të gjerë në bazat ndërkombëtare të të dhënave dhe ndikimin në rritje të kërkimeve të stafit akademik.
Pozicionimi në vendin e dytë në nivel kombëtar e shndërron Universitetin “Haxhi Zeka” në një forcë serioze akademike, që ndjek standardet ndërkombëtare dhe po ngjitet me ritme të shpejta drejt niveleve të ekselencës. Ky rezultat konfirmon orientimin e universitetit drejt kërkimit shkencor cilësor, inovacionit dhe krijimit të një mjedisi modern e gjithëpërfshirës për studentët dhe akademikët.
