Një bombë ruse me rrëshqitje goditi sot një lagje të banuar në Zaporizhzhia, duke vrarë të paktën pesë persona dhe duke shkatërruar disa blloqe banimi dhe një treg lokal. Lajmin e konfirmoi kreu i administratës ushtarake rajonale, Ivan Fedorov, i cili tha se kjo është hera e tretë që nga fillimi i luftës që qyteti goditet nga një sulm i tillë.
Bomba, një armë sovjetike e modifikuar që lëshohet nga avionë rusë që fluturojnë në lartësi të mëdha, ka shkaktuar për muaj të tërë shkatërrime masive në qytetet pranë vijës së frontit. Ukraina aktualisht nuk ka kundërmasa efektive ndaj këtij lloji të armëve.
Ndërkohë, një sulm me dron rus goditi një zonë banimi në Odesa, duke lënë pesë persona të plagosur.
Ukraina nën valë sulmesh intensive
Sulmet e sotme vijnë vetëm dy ditë pas masakrës së rëndë në Ternopil, ku një breshëri raketash dhe dronësh rus vrau 31 persona, përfshirë gjashtë fëmijë, dhe plagosi 94 të tjerë. Nga ai sulm, 13 persona vazhdojnë të jenë të zhdukur, ndërsa ekipet e emergjencës vijojnë kërkimet mes rrënojave të blloqeve të shembura.
Autoritetet ukrainase thanë se Rusia përdori një arsenal të gjerë armësh ajrore, duke përfshirë raketa Kh-101, Kalibr dhe një raketë balistike.
Dimër pa energji dhe pa siguri
Me rritjen e sulmeve ajrore të Rusisë, infrastruktura energjetike e Ukrainës është nën presion ekstrem. Në shumë qytete, civilët po përballen me mbi 15 orë pa rrymë në ditë, ndërsa temperaturat po bien dhe dimri po afrohet.
Situata humanitare pritet të përkeqësohet ndjeshëm, ndërsa sulmet ndaj objektivave civile dhe energjetikë po intensifikohen nga muaji në muaj.
Ukraina i ka bërë thirrje komunitetit ndërkombëtar për sisteme shtesë të mbrojtjes ajrore, në mënyrë që të shmangen tragjedi të tjera ndaj popullsisë civile.
