Procesi gjyqësor në Dhomat e Specializuara ndaj katër ish-krerëve të Ushtrisë Çlirimtare të Kosovës po i afrohet përfundimit, pas një maratone të gjatë dëshmish dhe ballafaqimesh mes prokurorisë dhe mbrojtjes. Institucionet e drejtësisë në Kosovë vlerësojnë se faza përmbyllëse e dëshmive ka sjellë elemente të rëndësishme që mund të ndikojnë në vlerësimin përfundimtar të trupit gjykues.
Dëshmitarë të mbrojtjes me pozita të larta ushtarake dhe diplomatike, përfshirë përfaqësues nga shtetet aleate, kanë paraqitur dëshmi që konsiderohen me peshë të veçantë. Sipas Fondit për të Drejtat Humanitare në Kosovë, këto deklarime kanë konfirmuar tezën e mbrojtjes se UÇK-ja ka funksionuar si një forcë vullnetare, me strukturë horizontale dhe jo me hierarki të centralizuar.
“Kontaktet direkte të dëshmitarëve me presidentin Thaçi dhe aktorë të tjerë të UÇK-së, si dhe informacionet që ata kanë ndarë me trupin gjykues, pritet të kenë ndikim të veçantë në vlerësimin përfundimtar,” tha për RTK-në Amer Alija nga FDHK. Ai shtoi se gjykata do të shqyrtojë në mënyrë të balancuar deklarimet e të dyja palëve.
Procesi është karakterizuar si një përballje e drejtpërdrejtë mbi dy çështje kyçe ligjore: përgjegjësinë komanduese dhe ndërmarrjen e përbashkët kriminale. Blendina Veliqi nga IKD theksoi se dëshmitë e paraqitura në mbrojtje kanë qenë konsistente me qëndrimin se UÇK-ja ishte një formacion i organizuar nga populli dhe jo një ushtri me komandë të strukturuar. “Secili dëshmitar ka folur mbi rolin e Hashim Thaçit gjatë periudhës së akuzës,” u shpreh ajo.
Ekspertët e drejtësisë parashikojnë që aktgjykimi të shpallet në pranverë ose në fillim të verës së ardhshme. Sipas tyre, faktorët vendimtarë për vendimin final do të jenë sjellja e dëshmitarëve, koherenca e rrëfimeve dhe pesha provuese e deklarimeve të paraqitura në gjykatë.