Shefja e Lartë e Politikës së Jashtme dhe të Sigurisë së BE-së, Kaja Kallas, ka mirëpritur diskutimet mbi propozimin prej 28 pikash të presidentit amerikan Donald Trump për t’i dhënë fund luftës në Ukrainë, por paralajmëroi se çdo përpjekje paqeje mbetet e rrezikuar nëse presioni ndaj Moskës ulet.
Në një intervistë për CNN – Connect the World, Kallas theksoi se deri tani Rusia nuk ka treguar asnjë gatishmëri për lëshime.
“Nuk duhet të harrojmë kush nuk e do paqen, dhe kjo është Rusia. Deri tani nuk kemi dëgjuar asnjë hap prapa nga ana e saj,” u shpreh përfaqësuesja e lartë e BE-së.
Ajo tha se fokusi i negociatave duhet të jetë sigurimi që Moska të mos sulmojë sërish dhe jo presioni mbi Kievin për të bërë kompromis.
“Në këtë luftë ka një viktimë dhe një agresor. Nuk mund të flasim për çfarë duhet të dorëzojë Ukraina, kur ajo nuk ka kryer asnjë agresion,” deklaroi Kallas.
Duke ngritur shqetësime mbi drejtimin e bisedimeve të paqes, ajo pyeti pse plani amerikan nuk parasheh detyrime konkrete për Rusinë.
“Cilat janë kërkesat ndaj Rusisë? Asnjë nga 28 pikat nuk përfshin lëshime nga Moska. Hapi i parë duhet të jetë që Rusia të zbatojë marrëveshjet ndërkombëtare që ka shkelur,” theksoi ajo.
Kallas kritikoi edhe idenë për kufizimin e ushtrisë së ardhshme ukrainase, një nga elementët më të debatueshëm të draftit.
“Nëse vendosim kufizime mbi Ukrainën, një vend që nuk ka pushtuar askënd, atëherë Rusia merr pikërisht atë që dëshiron,” përfundoi ajo.
Deklaratat e Kallas vijnë ndërsa SHBA, Ukraina dhe aleatët evropianë po përpiqen të riformulojnë planin e paqes, në përpjekje për të shmangur një marrëveshje që perceptohet si e favorshme për Kremlinin.