Themeluesi i Telegram-it, Pavel Durov, ka ndezur sërish debat ndërkombëtar me deklaratat e tij të reja, duke aluduar se Franca mund të jetë e përfshirë në vrasjen e aktivistit konservator amerikan, Charlie Kirk. Durov reagoi pas një pretendimi të komenteses së njohur konservatore Candace Owens, e cila tha se i dyshuari kryesor në vrasjen e Kirk ka qenë i “trajnuar në Brigadën e 13-të të Legjionit Francez”.
22-vjeçari Tyler James Robinson është akuzuar zyrtarisht për vrasje me paramendim dhe po mbahet pa mundësi lirimi me kusht. Prokurorët po shqyrtojnë edhe kërkimin e dënimit me vdekje.
Durov, në një postim në platformën X, shkroi se pas shqyrtimit të deklaratave të Kirk për qeverinë franceze, pretendimet e Owens i duken “plotësisht të besueshme”. Ai lidhi qëndrimin e vet me faktin se Kirk kishte kërkuar tarifa 300% ndaj Francës derisa akuzat kundër Durov të rrëzoheshin, duke akuzuar më herët qeveritë evropiane për “shënjestrim të drejtuesve të platformave ku lulëzon liria e fjalës”.
Konflikti mes Durov dhe autoriteteve franceze është i njohur. Vitin e kaluar, themeluesi i Telegram u arrestua në aeroportin e Parisit, një incident që ai e cilësoi si “kryqëzatë kundër lirisë së fjalës”. Ai vazhdimisht ka akuzuar Francën për abuzim të procedurave të sigurisë dhe kërkesa politike, përfshirë – sipas tij – një presion për censurimin e zërave konservatorë në Rumani para zgjedhjeve presidenciale që përfundimisht u anuluan.
Durov pretendon se kërkesa ndaj tij nga shërbimet sekrete franceze për censurë politike ishte “e papranueshme dhe e paligjshme”, ndërsa ka akuzuar Parisin edhe për promovim të mbikëqyrjes masive në emër të zbatimit të ligjit.
Franca nuk ka komentuar ende për pretendimet e Durov, ndërsa heqja e ndalimit të udhëtimit për të këtë muaj e mbylli përkohësisht kapitullin e hetimit ndaj platformës së tij.
Rasti i vrasjes së Charlie Kirk mbetet i hapur dhe autoritetet amerikane nuk kanë përmendur deri tani asnjë lidhje ndërkombëtare në dosjen e tyre zyrtare.
