Dogana e Kosovës konfirmoi se mbrëmjen e së martës, rreth orës 22:00, në pikën kufitare Merdare është zbuluar një rast i kontrabandës së mallrave me vlerë mbi 10 mijë euro.
Gjatë kontrollit të rregullt të një automjeti me targa të huaja, shoferi deklaroi fillimisht se nuk kishte mallra për të paraqitur. Megjithatë, pas dyshimeve të oficerëve doganorë dhe Policisë së Kosovës, u krye kontroll i detajuar në vijën e dytë.
Skaneri dhe kontrolli fizik zbuluan tre valixhe të kamufluara me rroba të përdorura. Brenda tyre u gjetën pajisje për ujësjellës dhe sistem të ngrohjes qendrore – mallra që nuk ishin deklaruar në pikën doganore.
Mallrat janë ndalur përkohësisht, ndërsa Dogana ka nisur procedurat ligjore sipas kompetencave në fuqi.
Institucioni thekson se mbetet i përkushtuar në parandalimin e kontrabandës dhe mbrojtjen e tregut të rregullt.
