Ukraina ka pranuar parimisht bazën e planit të paqes të propozuar nga administrata Trump, ndërsa disa pika teknike mbeten ende për t’u mbyllur. Lajmin e ka konfirmuar një zyrtar amerikan për NewsNation, duke theksuar se “thelbi i marrëveshjes është pranuar”.
Rustem Umerov, sekretari i Këshillit të Sigurisë Kombëtare dhe Mbrojtjes së Ukrainës, konfirmoi se delegacionet amerikane dhe ukrainase kanë rënë dakord për “kushtet kryesore” gjatë takimeve në Gjenevë.
Në një postim në platformën X, Umerov deklaroi se diskutimet kanë qenë “produktive dhe konstruktive”, duke falënderuar përpjekjet e Presidentit Trump për të mbyllur luftën. Ai tha se tani pritet koordinimi me partnerët evropianë dhe një vizitë e Zelenskyt në Shtëpinë e Bardhë në nëntor për të finalizuar marrëveshjen.
SHBA ka rritur presionin diplomatik për të arritur mbylljen e konfliktit, ndërsa fundjava në Gjenevë solli takime intensive mes delegacioneve të SHBA-së, Ukrainës dhe aleatëve evropianë për planin prej 28 pikësh.
Plani është kritikuar në disa kryeqytete evropiane si tepër i njëanshëm pro Rusisë, ndërsa zyrtarët amerikanë këmbëngulin se dokumenti nuk është final dhe se pika të caktuara po riformulohen.
Zelensky u shfaq i kujdesshëm, por optimist. Ai tha se “lista e hapave të nevojshëm për paqe mund të zbatohet”, duke theksuar se çështjet më të ndjeshme do t’i diskutojë drejtpërdrejt me Trumpin.
Nga ana tjetër, anëtari i delegacionit ukrainas, Oleksandr Bevz, konfirmoi se numri i pikave në draft ka ndryshuar, por mohoi raportimin se plani është reduktuar në 19 pika. Sipas tij, janë hequr elemente që lidhen vetëm me marrëdhëniet SHBA–Rusi ose pjesë të dyfishta pa relevancë për Ukrainën.
