Dhoma e Deputetëve në Itali ka miratuar unanimisht ligjin e ri që e njeh femicidin si krim më vete, duke futur nenin 577-bis në Kodin Penal. Ligji parashikon burgim të përjetshëm për këdo që vret një grua për shkak të urrejtjes, diskriminimit, abuzimit ose përmes kontrollit, dominimit dhe posedimit.
Projektligji, i miratuar fillimisht nga Qeveria më 7 mars dhe më pas nga Senati, vendos një kuadër të ri ligjor që e trajton vrasjen e grave si formë të veçantë të vrasjes, me motivim të bazuar në gjini — në përputhje me Konventën e Stambollit dhe direktivën e BE-së.
Çfarë ndryshon me ligjin e ri
– Burgim i përjetshëm për vrasjen e një gruaje për arsye të lidhura me gjininë, refuzimin për lidhje emocionale, apo kufizimin e lirisë personale.
– Krimi konsiderohet femicid edhe kur motivi lidhet me kontroll, posedim ose dominim të partnerit.
– Përjashtim i krimeve të Kodit të Kuq nga afati 45-ditor i përgjimeve.
– Byzylyk elektronik i përmirësuar, që reagon në distancë deri 1 km.
– Kufizime më të rrepta për përfitimet e burgut dhe lirimin me kusht për të dënuarit për femicid, të bazuara në vëzhgim profesional të sjelljes.
– Ndryshime edhe për të miturit e dënuar — kohëzgjatje më e shkurtër e lirimit me kusht.
Mbrojtje më të forta për viktimat
– Gjyqtari duhet të informojë jo vetëm viktimën por edhe familjarët në rast të ndryshimit të masave mbrojtëse.
– Vajzat mbi 14 vjeç mund të hyjnë në qendrat kundër dhunës pa autorizim prindëror.
– Ndihmë juridike falas për viktimat e tentativës së vrasjes së rëndë ose femicidit, pavarësisht të ardhurave.
Jetimët e femicidit
Ligji krijon një paketë të gjerë mbrojtjeje për jetimët e femicidit, duke përfshirë:
– Regjistër kombëtar për të evidentuar situatën e tyre sociale.
– Akses të thjeshtuar në fondet dhe shërbimet shëndetësore.
– Mbështetje psikologjike të strukturuar.
– Avokat publik.
– Mbrojtje të privatësisë për të miturit.
Këto masa vlejnë edhe për fëmijët e nënave që kanë mbijetuar tentativës së femicidit, por nuk kujdesen dot më për fëmijët.
Parandalimi dhe trajnimi
Ligji synon të frenojë dhunën edhe përmes:
– Fushatave të informimit kundër drogave të përdhunimit.
– Krijimit të një komiteti teknik për monitorimin e substancave psikotrope.
– Trajnimit të gjyqtarëve dhe personelit shëndetësor për të shmangur viktimizimin dytësor.
– Raport vjetor të Ministrisë së Drejtësisë mbi zbatimin e ligjit.
