Forca e Sigurisë së Kosovës ka njoftuar se të mërkurën, më 27 nëntor, do të organizojë aktivitetin tradicional “Dita e Hapur”, me rastin e Ditës së Forcës. Ngjarja do të zhvillohet nga ora 09:00 deri në 14:00 në të gjitha kazermat kryesore të vendit.
Në kazermën “Adem Jashari” në Prishtinë, duke nisur nga ora 09:30, pritet të jenë të pranishëm udhëheqës të lartë shtetërorë, përfaqësues të institucioneve, si dhe ambasadorë të vendeve mike që mbështesin vazhdimisht FSK-në dhe zhvillimin e saj.
Kazermat që mund t’i vizitoni
Qytetarët janë të ftuar të vizitojnë kazermat e FSK-së në:
-
Prishtinë
-
Prizren
-
Pomozotin
-
Istog
-
Ferizaj
-
Mitrovicë
-
Gjilan
Gjatë vizitave, publiku do të ketë mundësi të shohë nga afër pajisjet moderne, kapacitetet teknike, si dhe një pjesë të aftësive ushtarake të Forcës së Sigurisë së Kosovës, të ekspozuara posaçërisht për këtë ditë festive.
FSK thekson se të gjithë qytetarët janë të mirëpritur dhe se “Dita e Forcës” synon të forcojë transparencën, afërsinë me publikun dhe krenarinë për institucionet e sigurisë së shtetit.
