Presidenti i Turqisë, Rexhep Taip Erdogan, ka vlerësuar si “shumë konstruktiv” takimin e sotëm me Papën Leon XIV, i cili zhvilloi vizitën e tij të parë zyrtare jashtë Vatikanit pikërisht në Ankara.
Në një postim në rrjetet sociale, Erdogan tha se ai dhe kreu i Selisë së Shenjtë ndajnë të njëjtën qasje për një sërë sfidash globale — nga konfliktet dhe krizat humanitare, te varfëria, padrejtësia dhe ndryshimet klimatike.
“Ne pajtohemi për një qasje që mbron paqen, vendos drejtësinë në qendër dhe mbështetet te mëshira,” shkroi Erdogan, duke theksuar se bisedimet u fokusuan në tema që lidhen me “ndërgjegjen e përbashkët të njerëzimit”.
Migracioni, temë kyçe e takimit
Presidenti turk nënvizoi rëndësinë e mbrojtjes së personave të detyruar të migrojnë dhe të eliminimit të shkaqeve që i shtyjnë drejt largimit, duke e konsideruar këtë një përgjegjësi morale globale.
Vizita e Papës Leon XIV, sinjal i fortë diplomatik
Erdogan vlerësoi faktin që Papa Leon XIV zgjodhi Turqinë si destinacion të parë të vizitave të tij ndërkombëtare pas marrjes së detyrës, duke e quajtur këtë një hap me simbolikë të fortë drejt thellimit të marrëdhënieve dhe nxitjes së paqes globale.
“Uroj që bisedimet tona të sjellin dobi për mbarë njerëzimin,” përfundoi Erdogan, duke përcjellë mesazhe paqeje dhe mirëqenieje edhe për botën katolike.
