Ndërmarrja “Trafiku Urban” në Prishtinë ka njoftuar se, pavarësisht votimit të bartjes së mjeteve buxhetore nga Kuvendi Komunal, transporti publik nuk mund të rifillojë ende, pasi fondet nuk janë bërë të qasshme nga institucionet qendrore.
Në një komunikatë zyrtare, ndërmarrja ka shprehur keqardhje për situatën dhe ka ritheksuar se pezullimi i shërbimit vjen si pasojë e pamundësisë financiare për të shlyer obligimet ndaj furnitorëve.
“Mjetet nuk mund të përdoren pa transferim nga niveli qendror”
“Trafiku Urban” thekson se votimi në Kuvendin Komunal është vetëm hapi i parë dhe se funksionalizimi i fondeve kërkon proces të plotë administrativ:
“Këto mjete mund të bëhen të përdorshme vetëm pas transferimit të tyre nga institucionet qendrore. Deri atëherë, ndërmarrja mbetet e pamundur të rifillojë operimin.”
Ndërmarrja u ka bërë thirrje institucioneve përgjegjëse – përfshirë ministrinë përkatëse – që të përshpejtojnë procedurat, në mënyrë që transporti publik të rikthehet sa më shpejt.
Protestat e punëtorëve vazhdojnë
Për shkak të situatës financiare, edhe protesta e paralajmëruar nga punëtorët e Trafikut Urban do të vazhdojë deri në zhbllokimin e mjeteve.
Biletat mujore do të kompensohen
Ndërmarrja ka njoftuar gjithashtu se të gjitha biletat mujore të qytetarëve do të kompensohen për ditët në të cilat shërbimi ka qenë jashtë funksioni.
“Me t’u bërë të qasshme mjetet financiare, shërbimi i transportit publik do të rikthehet pa vonesë,” thuhet në njoftim.
