Kompania Rajonale e Ujësjellësit “Prishtina” ka njoftuar se Impianti i Trajtimit të Ujit (ITU) Shkabaj ka dalë jashtë funksionit që nga ora 05:00 e mëngjesit të sotëm, për shkak të nivelit shumë të lartë të turbullirave në kanalin Ibër-Lepenc. Sipas kompanisë, turbullirat janë shkaktuar nga punimet që po zhvillohen në kanal, i cili nuk menaxhohet nga KRU “Prishtina”.
Si rezultat, disa zona kanë mbetur pa furnizim me ujë të pijshëm:
-
Fushë Kosova
-
Drenasi
-
Obiliqi
-
Një pjesë e lagjes Kalabria në Prishtinë
-
Pikat e larta të lagjes Arbëria
Po ashtu, reduktime dhe ndërprerje të furnizimit priten edhe në disa zona të tjera të kryeqytetit.
Ekipet e ujësjellësit ndodhen në terren dhe po monitorojnë situatën në mënyrë të vazhdueshme. Furnizimi me ujë do të rikthehet menjëherë sapo të stabilizohen parametrat e ujit në kanalin furnizues.
Nga KRU “Prishtina” u kërkohet ndjesë konsumatorëve për shqetësimet e shkaktuara, duke theksuar se situata ka ardhur “pa fajin tonë”, pasi kanali Ibër-Lepenc menaxhohet nga një institucion tjetër.
Ndërkohë, impiantet Albanik dhe Badoc po punojnë me kapacitet maksimal për të trajtuar ujë dhe për të zbutur ndikimin e ndërprerjes.
