Shqipëria ka hyrë në një fazë maratonike të procesit të integrimit, ku ambicia për të mbyllur negociatat brenda vitit 2027 e ka vendosur Kuvendin përballë një prej sfidave më të rënda legjislative të këtyre dekadave. Report TV ka mësuar se dosja integruese që Brukseli i ka lënë Tiranës përmban rreth 500 ligje, të cilat duhet të miratohen në dy vitet e ardhshme për të çelur dhe mbyllur kapitujt e negociatave.
Thirrja e BE-së nuk lë më kohë për pritje. Vetëm gjatë muajit dhjetor, deputetët janë të detyruar të votojnë 20 ligje kyçe – disa prej tyre me natyrë të ndjeshme, që kërkojnë 84 vota, pra konsensus të gjerë politik. Nëse bashkëpunimi me Partinë Demokratike dështon, shumica socialiste do të kërkojë mbështetje nga partitë e vogla parlamentare.
Lista e ligjeve që duhet të kalojnë brenda dhjetorit prek disa fusha vitale: drejtësinë, etikën në administratë, mediat, sponsorisimet, konfliktin e interesit, mbrojtjen nga dhuna, si edhe reformimin e komisioneve hetimore dhe rolit të Kuvendit në procesin e integrimit. Miratimi i Kodit Penal dhe ndryshimet në organet drejtuese të sistemit të drejtësisë janë ndër çështjet që kërkojnë votim të cilësuar.
Burime nga Parlamenti pohojnë se Kryeministri Edi Rama ka ngritur një grup të përbashkët pune mes Kuvendit dhe Qeverisë për të koordinuar fluksin e jashtëzakonshëm të akteve. Detyrat janë shpërndarë mes ministrive dhe deputetëve, me synimin për të mbajtur ritmin që kërkon BE.
Ligjet e detyruara për t’u miratuar në dhjetor:
-
Për vullnetarizmin
-
Për ndryshimet klimatike
-
Për funksionimin e komisioneve hetimore të Kuvendit
-
Për Avokatin e Popullit
-
Për parandalimin e konfliktit të interesave
-
Për statusin e gjyqtarëve dhe prokurorëve
-
Për organet e qeverisjes së sistemit të drejtësisë
-
Kodi Penal
-
Për sinjalizimin dhe mbrojtjen e sinjalizuesve
-
Për masat ndaj dhunës në marrëdhëniet familjare
-
Për rregullat e etikës në administratën publike
-
Për shërbimet e përkujdesit shoqëror
-
Për sponsorizimet
-
Për mbrojtjen nga diskriminimi
-
Për mediat audiovizive
-
Për barnat narkotikë dhe lëndët psikotrope
-
Për kontrollin e lëndëve narkotike dhe psikotrope
-
Për rolin e Kuvendit në procesin e integrimit
-
Për mbështetjen dhe zhvillimin e startupe-ve
Nëse Shqipëria ia del të mbajë këtë ritëm, viti 2027 mund të shndërrohet vërtet në një pikë historike të rrugës drejt Bashkimit Evropian. Por përpara deputetëve qëndron një mal pune – dhe një afat që nuk fal.
