Presidenti rus Vladimir Putin ka lëshuar një paralajmërim të ashpër ndaj vendeve evropiane, duke deklaruar se Rusia “nuk e planifikon luftën, por është gati menjëherë nëse Evropa e nis”. Deklarata erdhi të martën gjatë një forumi investimesh në Moskë, ku Putin i akuzoi shtetet evropiane për mungesë të një “axhende paqësore”.
Sipas tij, Evropa është “në anën e luftës” për shkak të mbështetjes së saj për Ukrainën.
“Nëse Evropa vendos të shkojë në luftë me Rusinë dhe vërtet e fillon këtë, shumë shpejt do të vijë momenti kur Moska nuk ka më me kë të negociojë,” deklaroi Putin, duke akuzuar liderët evropianë se “jetojnë në iluzione” për ta mundur Rusinë.
Ai përsëriti se kërkesat e BE-së për t’i dhënë fund pushtimit të Ukrainës janë “të papranueshme”, duke nënvizuar se Moska pranon të negociojë vetëm me administratën amerikane dhe presidentin Donald Trump — duke i përjashtuar qëllimisht udhëheqësit e Evropës dhe presidentin ukrainas Volodymyr Zelenskyy.
Alarm nga Berlini: Rusia po krijon kapacitet për të sulmuar NATO-n deri në vitin 2029
Deklaratat e Putinit përkojnë me paralajmërime të reja nga shërbimet gjermane të inteligjencës, të cilat sipas ministrit të Jashtëm Johann Wadephul tregojnë se Moska po përgatitet për mundësinë reale të një lufte kundër NATO-s brenda katër viteve të ardhshme.
“Sipas vlerësimeve tona, Rusia po krijon që tani mundësinë për të zhvilluar luftë kundër NATO-s deri në vitin 2029. Duhet të jemi gati dhe të pengojmë çdo agresion të mëtejshëm rus,” thuhet në deklaratën e Ministrisë së Jashtme gjermane.
Evropa nën presion: dronë, sabotime dhe shkelje ajrore
Qeveritë evropiane raportojnë një rritje të madhe të aktiviteteve të dyshuara të inteligjencës dhe operacioneve hibride të lidhura me Rusinë, përfshirë:
-
sulme kibernetike të koordinuara,
-
tentime sabotimi,
-
inkursione ajrore nga avionët rusë,
-
depërtim të dronëve të paidentifikuar në hapësirat ajrore të NATO-s,
-
ndërprerje të funksionimit të aeroporteve në shtetet baltike dhe Evropën Lindore,
-
bombardime të infrastrukturës kritike, si linjat hekurudhore polake.
Komisioneri Evropian për Mbrojtjen, Andrius Kubilius, paralajmëroi se BE është ende prapa në mbrojtjen kundër dronëve dhe në përshtatjen e doktrinave moderne të luftës.
“Nuk kemi kapacitete të mjaftueshme zbulimi, as mjete me kosto efektive për neutralizimin e dronëve. Përgatitjet tona nuk janë në nivelin që kërkon situata,” deklaroi Kubilius.Euronews.
