Kompania për Distribuimin e Energjisë Elektrike në Kosovë (KEDS) ka njoftuar se të shtunën, më 6 dhjetor 2025, do të realizohen punime të domosdoshme për sigurinë e sistemit energjetik. Si pasojë, një sërë lokalitetesh në disa rajone të vendit do të përballen me ndërprerje të planifikuara të energjisë.
Ndërprerjet do të prekin rajonin e Prishtinës, Prizrenit, Mitrovicës dhe Gjakovës, me orare të ndryshme varësisht nga zona dhe lloji i punimeve – qoftë për siguri të sistemit, projekte investive apo punime nga palë të treta.
PRISHTINË
Në kryeqytet ndërprerjet do të nisin nga ora 09:00 dhe do të zgjasin deri rreth orës 15:30, në zona si Fushë Kosova, Veterniku, Hajvalia (Ulzati), Graçanica dhe disa institucione të rëndësishme. Shumica e ndërprerjeve lidhen me kalimin e daljeve ndërmjet transformatorëve si dhe me ndërrimin apo energjizimin e rrjetit të ri elektrik.
Ndër zonat që mbesin pa energji janë edhe: Qendra e Fushë-Kosovës, pjesë të Veternikut, Rezonanca, lagjja Qëndresa, një pjesë e Çagllavicës, kodrina e Muharrem Fejzës, Ministria e Administratës Publike, si dhe Graçanica te Varrezat.
PRIZREN
Në Suharekë dhe Prizren ndërprerjet do të ndodhin ndërmjet orës 09:00 dhe 14:00, kryesisht në zona rurale si Peqan, Bllacë, Duhel, Nishor, Kosterrc e Semetisht. Në qytetin e Prizrenit pa rrymë do të mbesin disa rrugë kryesore si “Bajram Curri”, “Xhevat Berisha”, “Mbreti Pleurat” dhe bulevarde me biznese e institucione.
MITROVICË
Në Skenderaj, nga ora 10:00 deri në 16:00 do të ketë ndërprerje te objekti “Syla Group” dhe në rrugën “17 Shkurti”, për shkak të punimeve sipas pëlqimit elektro-energjetik.
GJAKOVË
Në Rahovec ndërprerjet pritet të zgjasin nga ora 08:00 deri në 16:00 në fshatra si Bratotin, Drenoc, Nushpal, Pataçan, Senoc, Varjak e Zatriq. Këto punime lidhen me projekte investive dhe manipulime në ndarësit e tensionit të mesëm.
KEDS apelon qytetarët që t’i marrin parasysh këto ndërprerje të planifikuara dhe të bëjnë përgatitjet e nevojshme për orët kur energjia elektrike nuk do të jetë e qasshme.
