Kreu i AAK-së, Ramush Haradinaj, ka konfirmuar sot bashkimin e Zafir Berishës me Aleancën, duke e quajtur atë një figurë me kontribut të pakontestueshëm në rrugëtimin e Kosovës — nga lufta e deri në ditët e sotme.
Në një postim publik, Haradinaj theksoi se Berisha është dëshmuar si njeri që nuk është thyer nga sfidat dhe nuk ka zgjedhur rrugë të lehta, por ka qëndruar besnik ndaj vizionit për një Kosovë me orientim të qartë perëndimor.
“Puna, veprimtaria dhe kontributi yt i gjatë janë vlerë e madhe e shoqërisë sonë. Gjithmonë ke qëndruar dinjitoz dhe besnik ndaj asaj që bashkë besuam: se Kosova ka nevojë për ndryshim dhe ecje para bashkë me aleatët e saj”, shkroi Haradinaj, duke i uruar Berishës punë të mbarë dhe sukses në angazhimet e reja politike.
Bashkimi i Zafir Berishës me AAK-në vjen në një moment kur skena politike kosovare është në lëvizje të shpejtë përpara zgjedhjeve të 28 dhjetorit, duke e bërë këtë hap një përforcim të rëndësishëm për kampin e Haradinajt.
