Presidenti ukrainas, Volodymyr Zelensky, ka bërë të ditur se është informuar nga delegacioni i tij për bisedimet e gjera që po zhvillohen në Florida mes përfaqësuesve të Ukrainës dhe Shteteve të Bashkuara, duke theksuar se Kievi mbetet i përkushtuar ndaj arritjes së “paqes së vërtetë”.
Në një postim në platformën X, Zelensky konfirmoi se ka zhvilluar një bisedë të gjatë me të dërguarin e posaçëm amerikan Steve Witkoff, dhëndrin e presidentit Donald Trump, Jared Kushner, si dhe me ministrin ukrainas të mbrojtjes Rustem Umerov dhe shefin ushtarak Andriy Khnatov.
Presidenti ukrainas theksoi se bisedimet kanë prekur “çështjet kyçe që mund të sigurojnë fundin e gjakderdhjes dhe të eliminojnë rrezikun e një pushtimi të ri rus”, duke shtuar se ekziston gjithmonë rreziku që Moska të mos respektojë angazhimet e saj, siç ka ndodhur në të kaluarën.
Zelensky tha se pret raport të plotë nga delegacioni ukrainas pas kthimit nga Florida, duke shtuar se jo çdo çështje mund të sqarohet përmes telefonit.
Ai falënderoi presidentin amerikan Donald Trump për “qasjen intensive” ndaj negociatave dhe konfirmoi se të dyja palët janë pajtuar mbi format e reja të bisedimeve dhe hapat që do të ndërmerren në vazhdim.
Ndërkohë, Witkoff e ka cilësuar takimin dyditor me Rustem Umerov si “shumë konstruktiv”, duke deklaruar se të dy palët kanë rënë dakord mbi një “kornizë të rregullimeve të sigurisë” që mund të hapë rrugën për një marrëveshje paqeje. Ata kanë diskutuar edhe kapacitetet e nevojshme për parandalim, të cilat do të garantonin një paqe të qëndrueshme.
Sipas palës amerikane, çdo përparim real në procesin e paqes varet nga gatishmëria e Rusisë për të marrë “masa për deeskalim dhe ndalimin e vrasjeve”.
Gjatë takimeve në Florida, delegacioni ukrainas është informuar po ashtu për bisedimin gati pesëorësh mes Steve Witkoff dhe presidentit rus Vladimir Putin në Moskë, një takim që Kremlini e përshkroi si “pa kompromis të arritur” rreth propozimit amerikan për paqe.
Bisedimet Kiev–Washington pritet të vazhdojnë në ditët në vijim, ndërsa Zelensky ka theksuar se çdo marrëveshje duhet të garantojë paqe, siguri dhe një proces të qartë rindërtimi për Ukrainën.
